Ikaw (March 2007)


Ikaw ang dahilan kung bakit may saya
May ngiti sa labi't may ningning ang mata
Ikaw nga ang araw ng bawat umaga
Kung tag-ulan naman, hatid mo'y pag-asa

Laman ka ng isip, hindi nawawaglit
Sa tuwi-tuwina sayo'y nasasabik
Mula sa paggisising hanggang managinip
Di nais mawalay kahit isang saglit

Lahat ng mayroon sayo'y iaalay
Sukdulang magtiis lumigaya ka lang
Sa bawat pagluha akong nahihilam
Ang kalungkutan mo'y aking kamatayan

Wagas na damdamin, laman nitong diddib
Mahalin mo lamang tanging ninanais
Dito sa puso ko, wala kang kapalit
Nabubuhay ako sa iyong pag-ibig



*Unang tula ng pag-ibig para kay Marlon S. Dela Cuadra

https://www.youtube.com/watch?v=MpdZxKycjcw



Comments

Post a Comment

Popular posts from this blog

Pagtutupi

Tirik na ang araw ng pagaalinlangan Tumuyo sa mga piraso ng damit Ngayo'y sinasamsam Kahapon nang maglaba'y may masasayang gunita Salansan ng matatamis at mapapait na alaala Nahulog ang panyo mula sa ipitan Tumuyo sa basang palangganang nakaabang Sana'y kaya ring tuyuin luhang bumabalong Pumupuno sa timba lungkot ay tumatapon Ipinasok sa silid ang tuyong mga damit Ipinatong sa kamang ngayo'y maluwang at nanlalamig Sininop isa isa bawat hugis at laki Iningatang magkahalo ang sa iyo'y itinabi Tinitiklop ang sakit at pait ng nakaraan Pinapagpag paninibugho't pag-aasam Pinasadahan ng mga kamay mga di malilimutang sandali Mga lukot at gusot sa laylayan ng pagmamahalan Isinilid na sa kahon ang natitirang pag-asa Itinupi't inilagay ang huling mga labada Sinarhan ng halik ikinandado ng pagpapaubaya Sa iyong paglisan huwag ng lilingon pa
Read more

7 Words Stories

Image
i.        Sa pagitan ng kahapon at ngayon .... pinagtagpo ii.       Pinagbuksan ang katok, sa aking buhay pinapasok iii.      Sa panaginip tayo ay masaya ... doon lang iv.       Yakap kita nang mahigpit, habang nakatalikod ka v.       "Mahal kita" ang sabi ko, ngumiti ka vi.      "Mahal mo rin ba ako?" ngumiti lang vii.      Nasasabik sa pagbabalik mo, s'yang sumalubong sa'yo viii.     Kumusta ka? Mas masaya ka na ba? ix.       Mailap ang antok mula nang mawala ka x.        Meron lamang "ikaw" at "ako," walang " TAYO "
Read more

Paruparo ng Bulaklak

Image
May kaway ang nektar ng Gitnang Silangan Sa mga bulaklak may ‘tinagong  yaman Salat na sa parang  yaring Inang bayan Pobreng paruparo’y nagpasyang lumisan Pag-asa’t naisin kipkip sa pag-alis Pinahid ang luhang agad namalisbis Pangamba at takot hinawing mabilis Kakayaning lahat at handang magtiis Naiwan ang puso balot ng sumpaan Tamis ng pag-ibig ang baong larawan “Walang mababago” ang huling usapan Muling magkikita tuloy ang lambingan Mainit na hangin, pumaso sa balat Banyagang salita hirap madalumat Tila umiiwas, abala ang lahat Estrangherong ngiti sa init ay salat Lubos ang ligaya pagsapit ng dilim Araw na napilas sa ‘king paninimdim Ang pangungulila’y tuloy sa paglalim Mahinhing paghibik tuwing takipsilim Pag-ibig  kong wagas tuluyang nagwakas Bumitiw sa tali, nagpilit kumalas Makulay na pakpak nawalan ng lakas Sa pagkaduhagi, paano aalpas? Madilim na ulap, malungkot na hangin Amang minamahal t...
Read more